Craig Bellamy og Gary Neville sleppa báðir við refsingu

Enska knattspyrnusambandið ætlar ekki að kæra þá Craig Bellamy, framherja Manchester City og Gary Neville, varnarmann, Manchester United, vegna framkomu þeirra í borgarslag félaganna á sunnudaginn.

Craig Bellamy sló þá til stuðningsmanns sem hafi komið inn á völlinn en Gary Neville þótti fara yfir mörkin í fagnaðarlátunum sínum þegar Michael Owen tryggði Manchester United sigurinn á sjöttu mínútu í uppbótartíma.

Gary Neville tók ekki þátt í leiknum en var við hlið Alex Ferguson á varamannabekknum. Mark Hughes notaði áköf fagnaðarlæti hans og stjórans sem dæmi um hversu langt Manchester City væri komið.

„Enska knattspyrnusambandið hefur gefið þeim Craig Bellamy hjá Manchester City og Gary Neville hjá Manchester United viðvörun vegna óskyldra atvika í leik liðanna á sunnudaginn," sagði í fréttatilkynningu frá sambandinu.