Dawson klár í slaginn

Harry Redknapp, stjóri Tottenham, hefur staðfest að Michael Dawson sé búinn að jafna sig á meiðslum sínum og geti spilað með liðinu á nýjan leik.

Tottenham mætir Preston annað kvöld og segir Redknapp að það komi vel til greina að Dawson fái að taka þátt í leiknum.

„Michael er í leikmannahópnum og gæti fengið að spila í klukkutíma. Það er ekki hægt að fara fram á meira enda er hann búinn að vera lengi frá," sagði Redknapp í samtali við enska fjölmiðla.

Hvorki Dawson né Jonathan Woodgate hafa spilað með Tottenham á leiktíðinni en enn er nokkuð í að sá síðarnefndi geti spilað á ný.

„Það er gott að fá Michael aftur. Hann er frábær drengur og góður leikmaður."