Vildi gera mynd á Íslandi

Tékkneski leikstjórinn Mil­os Forman er staddur hér á landi á vegum RIFF, alþjóðlegrar kvikmyndahátíðar í Reykjavík. Á blaðamannafundi í gærdag upplýsti Forman að hann hafi ætlað að gera kvikmynd á Íslandi.

Milos Forman hlaut heiðursverðlaun RIFF fyrir æviframlag sitt til kvikmyndalistarinnar, en hann er einn fjögurra núlifandi leikstjóra sem tvívegis hafa hlotið Óskarsverðlaunin sem besti leikstjórinn, þau hlaut hann fyrir kvikmyndirnar Gaukshreiðrið og Amadeus. Þrjár kvikmyndir Formans verða sýndar á kvikmyndahátíðinni í ár.

Forman kom til landsins á sunnudaginn og mun þetta vera í fyrsta sinn sem hann sækir Ísland heim. „Ég varð heillaður af landslaginu strax á leið frá flugvellinum. Íslendingum finnst landslagið ef til vill ómerkilegt en mér fannst þetta alveg einstakt,“ sagði hann á blaðamannafundi sem haldinn var á Hótel Plaza í gær.

Kvikmyndir Milosar Formans fjalla gjarnan um persónur sem hafa orðið undir í samfélaginu en berjast gegn kúgun og yfirvaldi. Hann segir að æskuárin í fyrrum Tékkóslóvakíu hafi haft mikil áhrif á persónusköpun sína. Foreldrar hans létust í útrýmingarbúðum nasista og sjálfur flúði hann til Bandaríkjanna á tímum kommúnistastjórnarinnar. „Ég gat ekki snúið heim því ég vissi að ef ég færi heim aftur þá fengi ég ekki að gera kvikmyndir.

Síðasta kvikmyndin sem ég hafði gert heima, Veisla slökkviliðsmannanna, hafði verið bönnuð af stjórninni þannig að ég vissi að það var engin von fyrir mig þar.“ Forman segist ekki hafa fylgst sérstaklega með íslenskri kvikmyndagerð undanfarin ár en vonar að hann fái mynddiska með sér heim. „Miðað við þann fjölda kvikmynda sem framleiddar eru hér árlega þá virðist íslensk kvikmyndagerð vera mjög kraftmikil, sérstaklega miðað við fólksfjölda.“ Forman segist hafa viljað gera kvikmynd hér á landi um skákina milli Bobby Fisher og Boris Spassky með þeim sjálfum í aðalhlutverki. „Spassky var tilbúinn til að taka að sér hlutverkið en eftir að hafa rætt við Fisher þá áttaði ég mig á því að hann mundi aldrei láta að stjórn né hafa agann sem þarf til að leika í kvikmynd. Ég ákvað því að hætta við verkefnið.“

Sérstök viðhafnarsýning á Gaukshreiðrinu verður klukkan 20.00 annað kvöld í stóra sal Háskólabíós. Milos Forman mun auk þess svara spurningum áhorfenda að sýningu lokinni.

sara@frettabladid.is