Skoðar hertar reglur til að stöðva netníð

Réttarfarsnefnd mun skoða hvort breyta eigi lögum til að taka á ólöglegri birtingu persónuupplýsinga á netinu í kjölfar ábendinga Persónuverndar, segir Ragna Árnadóttir dómsmála­ráðherra.

„Þetta er áhugaverð ábending og brýnt að taka þetta upp. Það veit það hver sem hefur farið inn á síður eins og ringulreid.is. Ég hef fengið til mín foreldra sem voru örvilnaðir vegna þess að úrræði vantar til að stöðva birtingu á netinu,“ segir Ragna.

Sigrún Jóhannesdóttir, forstjóri Persónuverndar, sendi dómsmálaráðherra bréf á dögunum þar sem lagt var til að dómstólar fengju völd til að loka fyrir aðgengi íslenskra netnotenda að síðum sem brjóta gegn persónuverndarsjónarmiðum, eins og fram hefur komið í Fréttablaðinu.

Fjarskiptafyrirtækin ákváðu nýlega að loka fyrir aðgang að netsíðunni ringulreid.org, sem er vistuð erlendis en haldið úti af íslenskum aðilum. Þar birtust reglulega myndir af fáklæddum barnungum stúlkum og drengjum, og jafnvel upplýsingar á borð við símanúmer og netföng.

Verði hugmyndir Persónuverndar að veruleika getur lögregla krafist þess að lokað sé fyrir viðlíka síður. Þá munu dómstólar fjalla hratt um málið og ákveða hvort lokað verður fyrir síðurnar.

„Þetta er málefni sem þarf að taka til athugunar, og mjög gott að Persónuvernd vakti máls á þessu með þessum hætti,“ segir Ragna. Hún segir þá leið virðast skynsamlega sem Persónuvernd leggi til, og því rétt sé að skoða hana nánar.

Í málum af þessu tagi togast á tjáningarfrelsið og persónuverndar­sjónarmið, og því eðli­legt að vald til að grípa í taumana liggi hjá dómstólum, segir Ragna.

„Mannréttindin eru þannig úr garði gerð að einstaklingur má ekki beita sínum mannréttindum þannig að hann gangi á réttindi annarra. Það er ekki hægt að skýla sér á bak við tjáningarfrelsið ef augljóslega er verið að brjóta gegn réttindum annarra, eins og hefur borið við á ýmsum síðum,“ segir Ragna.

Persónuvernd á netinu hefur einnig verið til skoðunar á hinum Norðurlöndunum, og verður norræn ráðstefna um málefnið haldin í Reykjavík 19. nóvember í Háskóla Íslands.

brjann@frettabladid.is