Hangeland reiknar með því að vera áfram hjá Fulham

Norski landsliðsfyrirliðinn Brede Hangeland hjá Fulham hefur verið sterklega orðaður við félagsskipti til Arsenal í sumar en hann staðfestir í nýlegu viðtali við VG í Noregi að hann búist fastlega við því að vera áfram í herbúðum Fulham þegar félagsskiptaglugganum lokar 1. september.

„Ég get ekki neitað því að ég var mjög upp með mér þegar ég heyrði af áhuga Arsenal. En það er allt sem bendir til þess að ég verði áfram hjá Fulham og spili með liðinu á yfirstandandi keppnistímabili.

Það eru annars eflaust margir komnir með leið á því að sjá andlitið á mér í slúðurblöðunum og ég er vissulega einn af þeim," segir Hangeland.