Chamakh býst við því að vera áfram hjá Bordeaux

Framherjinn eftirsótti Marouane Chamakh á síður von á því að yfirgefa herbúðir Frakklandsmeistara Bordeaux áður en félagsskiptaglugginn lokar 1. september næstkomandi en ensku úrvalsdeildarfélögin Arsenal, Sunderland og West Ham voru öll orðuð við kappann.

„Mér skilst að stjórnarformaður Bordeaux hafi gefið það út að hann sé 99% viss um að ég verði áfram hjá félaginu og ef til vill hefur hann rétt fyrir sér.

Mér finnst líkurnar á því að ég fari alltaf minnka með hverjum deginum sem líður. Ég var svekktur yfir því að ekkert kom út úr samningnaviðræðunum við Arsenal og nú skilst mér að sama sé uppi á teningnum með West Ham," segir Chamakh í viðtali við L'Equipe.

Núgildandi samningur Chamakh rennur út næsta sumar og knattspyrnustjórinn Arsene Wenger hjá Arsenal er búinn að gefa í skyn að hann kunni að endurvekja áhuga sinn á leikmanninum þá. Hann verður þó væntanlega ekki einn um hituna ef til þess kemur að Chamakh verði fáanlegur á frjálsri sölu.