Leverkusen að vinna kapphlaupið um Elm?

Sænski U-21 árs landsliðsmaðurinn Rasmus Elm hefur verið eftirsóttur eftir að hafa slegið í gegn í Evrópukeppni U-21 árs landsliða í sumar en ensku úrvalsdeildarfélögin Everton og Fulham eru á meðal þeirra félaga sem hafa haft augastað á leikmanninum.

Forráðamenn Kalmar hafa sætt sig við að missa Elm og Svante Samuelsson, yfirmaður knattspyrnumála hjá sænska félaginu, telur að líklega verði gengið frá málum fljótlega.

„Við höfum þegar neitað nokkrum kauptilboðum en það gæti eitthvað gerst í málum Elm á næstu dögum," segir Samuelsson.

Samkvæmt heimildum Sky Sports fréttastofunnar er þýska félagið Bayer Leverkusen talið vera líklegasti áfangastaður Elm en AZ Alkmaar er einnig sterklega orðað við leikmanninn.