Halldór Hermann: Ekkert mark í 3114 mínútur og svo tvö á 16 mínútna kafla

Framarinn Halldór Hermann Jónsson opnaði markareikning sinn í úrvalsdeild karla í 5-0 sigri Fram á Keflavík í Pepsi-deild karla. Halldór Hermann skoraði tvö mörk í leiknum en hann hafði ekki skorað í fyrstu 34 leikjum sínum í efstu deild fyrir leikinn á Laugardalsvellinum í gær.

Halldór Hermann lék alla 22 leikina og allar 1980 mínúturnar með Fram í deildinni í fyrra en tókst ekki að skora. Hann var búinn að leika 12 af 13 leikjum Framliðsins í sumar og samtals í 1080 mínútur til viðbótar.

Þegar Halldór Hermann kom Fram í 3-0 á 54. mínútu leiksins í gær var hann búinn að bíða eftir sínu fyrsta marki í úrvalsdeild karla í 3114 mínútur. Biðin var hinsvegar ekki löng eftir því næsta marki því aðeins sextán mínútum síðar bætti Halldór Hermann við öðru marki og kom Fram í 4-0.

Fyrra markið sitt skoraði Halldór Hermann með laglegum skalla eftir fyrirgjöf frá Heiðari Geir Júlíussyni en seinna markið skoraði hann með þrumuskoti í slánna og inn rétt fyrir innan vítateigslínuna.