Wenger biður fólk að standa með Adebayor

Arsene Wenger, knattspyrnustjóri Arsenal, hefur biðlað til stuðningsmanna félagsins að standa með sóknarmanninum Emmanuel Adebayor.

Leikmaðurinn var í sumar sterklega orðaður við Barcelona og Real Madrid og gaf það í skyn að hann vildi yfirgefa Arsenal. Hann fór síðan fram á umtalsverða launahækkun hjá Arsenal og var það ekki til að auka vinsældir hans meðal dyggustu stuðningsmanna.

Adebayor fékk misjafnar móttökur frá áhorfendum þegar Arsenal lék sinn fyrsta leik í ensku úrvalsdeildinni um síðustu helgi.

„Við þurfum að standa við bakið á honum og sýna honum stuðning því hann er mjög mikilvægur liðinu. Þú vilt að stuðningsmenn liðsins þíns standi með þér," sagði Wenger.

„Það sem átti sér stað í sumar hafði ekki áhrif á hans löngun til að standa sig. Allir leikmenn þurfa að finna það að þeir séu velkomnir," sagði Wenger.