Obama blóm í fallegum garði West Ham aðdáenda

Svo gæti farið að forseti hins frjálsa heims mætti á leiki hjá Íslendingaliðinu West Ham. Mögulegt forsetaefni Demókrata, Barack Obama, er eindreginn stuðningsmaður liðsins.

„Aðdáendur liðsins koma víða að úr heiminum og úr ýmsum starfsstéttum. Hann er bara eitt blómið í þeim fallega garði stuðningsmanna", segir Ásgeir Friðgeirsson, varaformaður stjórnar West Ham.

Systir Obama er gift Breta, og heillaðist forsetakandídatinn af liðinu í heimsókn til landsins fyrir fimm árum. Hann þótti sjálfur liðtækur fótboltamaður þegar hann var í námi við Harvard háskóla. Hann horfir á leiki í úrvalsdeildinni hvenær sem færi gefst, og fylgist með gengi liðsins síns í gegnum ættingja sína í Bretlandi, sem allir eru gallharðir stuðningsmenn West Ham.

Vonast aðdáendur liðsins nú eftir því að Obama muni syngja söng liðsins, „I'm Forever Blowing Bubbles" alla leið í Hvíta húsið.

Möguleikarnir á því að það gerist jukust tökuvert um helgina þegar Obama rústaði helsta andstæðingi sínum í forvali Demókrata, Hillary Clinton, í forkosningunum í Suður-Karólínu. Hillary hefur líka skoðanir á fótbolta, en hún mun vera aðdáandi Manchester United.