Dýralæknar betri í fjármálum en stuttbuxnaliðið

Dýralæknar kunna öðrum fremur skil á þróun fjármála í efnahagkreppu. Þessari niðurstöðu kemst Össur Skarphéðinsson iðnaðarráðherra að á bloggi sínu í dag.

Össur segir að Árni M. Mathiesen fjármálaráðherra sé sem kunnugt er dýralæknir með hrossalækningar sem sérgrein, og tekur svo sem dæmi annan færan dýralækni.

Sá heitir William Fall, og er forstjóri fjármálafélagsins Straums. Fall er eldri en tvævetur og upplifað kreppu áður. Segir Össur að fyrr í vetur meðan aðrir bankastjórar voru að fara á taugum, hafi Fall verið spurður að því hvort Íslendingar kæmust gegnum kreppuna.

Hann þóttist hann nokkuð viss um það. Skortsölumangararnir myndu gefast upp einn af öðrum og skuldatryggingarálagið lækka í kjölfarið. Össur segir þetta nú vera að ganga eftir, og hægt sé að draga ýmsar ályktanir af því.

,, Af þessu mætti auðvitað draga þá ályktun að dýralæknar séu vel til þess fallnir að sinna fjármálum banka og ríkja - að minnsta kosti eru þeir taugasterkari en stuttbuxnaliðið sem stýrir flestum bönkunum," ritar Össur.