Krefjast réttlætis vegna peningamarkaðssjóða

Baráttuhópur sem berst fyrir því að fá tap sitt í peningabréfum Landsbanka bætt, hefur opnað vefsíðuna www.rettlaeti.is. Meðlimir hópsins, sem eru um fimm hundruð talsins, krefjast þess að innistæður þeirra séu tryggðar líkt og annarra sparifjáreigenda. Þeir hafa gefið stjórnvöldum frest til fimmtánda desember til að koma til viðræðna við sig um úrbætur. Að öðrum kosti verði gripið til aðgerða.

Eigendur peningabréfa Landsbankans töpuðu um þriðjungi innistæðu sinnar þegar bankarnir féllu. Hópurinn leggur til að tapið verði bætt til dæmis með inneign á verðtryggðum reikningum, hlutabréfum í Nýja Landsbankanum, skattaafslætti eða skuldajöfnun.

Fólkið segir að það hafi eindregið verið hvatt til þess að velja þessa ávöxtunarleið og krefst meðal annars rannsóknar á markaðssetningu peningabréfa, á fjármagnsútstreymi úr sjóðnum fyrir gjaldþrot og hvernig fjárfestingarstefnu sjóðsins hafi verið breytt án þess að það hafi verið kynnt eigendum bréfanna.

Hópurinn segir sparnað í peningabréfum ekkert frábrugðinn öðrum sparnaði.

Það fólk sem hafi tapað á þeim sé af ýmsum toga, öryrkjar sem geymdu bætur, ellilífeyrisþegar sem höfðu sparað lengi eða selt fasteignir, launþegar sem hafi lagt fyrir hluta af launum, einstaklingar sem höfðu fengið arf, ungt fólk að safna fyrir námi eða íbúðarkaupum og fyrirtæki sem geymdu rekstrar- eða varasjóði sína í bréfunum.

Þá hafi margir notað bréfin til að geyma hagnað af fasteignakaupum meðan beðið var eftir að kaupa nýja. Sumir hafi einnig haft fyrirætlanir um að greiða niður skuldir með bréfunum, en þær ávaxtist nú hratt hjá sömu bönkum og seldu bréfin.

„Það sem fólk innan baráttuhópsins á sameiginlegt er að hafa ekki eytt um efni fram heldur lagt fjármuni sína til hliðar og leitað öruggrar ávöxtunarleiðar og geymslu fyrir fé sitt," segir í tilkynningu frá hópnum. „Þetta fólk eru skattgreiðendur og eru í sama hópi og þeir sem þurfa nú að taka á sig allar þær byrðar sem fylgja kreppunni."