Slúður dagsins á Englandi

Breska pressan er full af safaríku slúðri úr ensku úrvalsdeildinni í dag. Þar segir m.a. að Tottenham sé við það að gera tilboð í kantmanninn David Bentley hjá Blackburn og að Manchester United ætli að gera Tottenham 25 milljón punda lokatilboð í Dimitar Berbatov.

The Sun segir að Alexander Hleb hjá Arsenal muni fara til Barcelona í dag fyrir 15 milljónir punda og að El-Hadji Diouf hjá Bolton neyðist til að spila áfram með liðinu þrátt fyrir að vilja fara þaðan - því engin tilboð hafi borist í krafta hans.

Daily Mirror segir að Tottenham muni kaupa David Bentley fyrir 17 milljónir punda og senda markvörðinn Paul Robinson til Blackburn í staðinn. Aston Villa mun vera að undirbúa 2,5 milljón punda tilboð í markvörðinn Brad Friedel og þá er sagt að miðvörðuinn franski Younes Kaboul sé á óskalista Portsmouth. Cardiff mun ætla að kaupa framherjann Marcus Bent fyrir 1 milljón punda og þá er markvörðurinn Scott Carson sagður á leið til Hull eða Middlesbrough.

Daily Star segir að Barcelona muni í vikunni bjóða Arsenal Samuel Eto´o og 15 milljónir punda í skiptum fyrir Emmanuel Adebayor. Þá segir blaðið að Manchester City hafi gert Barcelona 22 milljón punda lokatilboð í Ronaldinho.

Independent segir að Everton sé að undirbúa tilboð í Darren Bent, framherja Tottenham, en blaðið segir ennfremur að Fulham sé á höttunum eftir Andy Johnson hjá Everton.