City með risatilboð í Ronaldinho?

Forráðamenn Barcelona greindu frá því í dag að félaginu hefði borist 25,5 milljón punda kauptilboð í brasilíska sóknarmanninn Ronaldinho frá Manchester City á Englandi.

Ronaldinho hefur verið tjáð að hann sé ekki inni í framtíðarplönum félagsins, en talið var víst að hann væri við það að semja við AC Milan á Ítalíu. Hann er sagður hafa mikinn hug á að fara til Mílanó, en ítalska félagið er aðeins sagt tilbúið að greiða um helming af þeirri upphæð sem City ku vera að bjóða í hann nú.