Hleb segir ummælin vera uppspuna

Alexander Hleb hefur neitað því að hafa talað illa um Arsene Wenger, knattspyrnustjóra Arsenal, og liðsfélaga sinn, Cesc Fabregas. Hleb hefur sterklega verið orðaður við Barcelona.

Enskir fjölmiðlar birtu í morgun viðtal við Hleb þar sem hann á að hafa lýst yfir að ósætti væri milli sín og Wengers og að Fabregas væri eigingjarn fyrir framan mark andstæðingana.

Hleb segir að þetta viðtal sé uppspuni frá rótum. „Ég er miður mín yfir þessum fréttum. Þetta er alls ekki satt. Þessi ummæli í blöðunum eru ekki frá mér. Ég myndi aldrei tala illa um þá tvo," sagði Hleb.

„Cesc er mjög góður vinur minn og Arsene er einn af þeim mönnum sem ég virði mest."