Dráttarvextir blikna við hlið 26,5% yfirdráttarvaxta

Það þykir sennilega einhverjum, sem ekki ganga með háskólagráðu í viðskipta- eða hagfræðum upp á vasann, að það skjóti skökku við að útlánsvextir banka séu allt að 1,5 prósentustigum hærri en dráttarvextir sem samkvæmt ákvörðun Seðlabanka Íslands eru nú 25%.

Á vaxtatöflu Glitnis er að finna upplýsingar um að vextir á yfirdráttarlánum einstaklinga séu 26,50%. Við skoðun vaxtatöflu Kaupþings sem gildir frá 1. maí 2008 kemur í ljós að vextir á raðgreiðslum kreditkorta eru 25,90%, yfirdráttarlán einstaklinga eru allt að 25,20% og skuld á almennu veltikorti kraumar á 25,70% vöxtum. Af stóru viðskiptabönkunum þremur rukkar Landsbankinn einn hvergi hærri vexti en 25,00%.

„Við fylgjum stýrivaxtaákvörðun Seðlabankans þegar við ákvörðum útlánsvexti," útskýrði Benedikt Sigurðsson, upplýsingafulltrúi Kaupþings. „Dráttarvextir Seðlabankans eru bara ákveðnir tvisvar á ári, 1. janúar og 1. júlí," sagði Benedikt enn fremur. Bætti hann við að 1. júlí gætu því orðið breytingar á dráttarvöxtum til samræmis við stýrivexti. Væri þetta skýringin á því að útlánsvextir bankanna gætu á tímum orðið dráttarvöxtunum hærri.