Kannast ekki við að strandað hafi á sjálfstæðismönnum

Arnbjörg Sveinsdóttir, þingflokksformaður Sjálfstæðisflokksins, kannast ekki við að það hafi strandað á sjálfstæðismönnum að breyta eftirlaunalögunum umdeildu á vordögum 2006. Guðni Ágústson, formaður Framsóknarflokksins, heldur því fram í Fréttablaðinu í dag að Halldór Ásgrímsson, þáverandi formaður Framsóknarflokksins, hafi reynt að ná samstöðu um málið á þeim tíma en það hafi strandað á andstöðu sjálfstæðismanna.

Arnbjörg segir að Guðni þurfi að útskýra mál sitt betur því hún kannist ekki við að lagt hafi verið fram frumvarp um málið á þessum tíma. „Það getur verið að þetta hafi komið til tals á öðrum vígstöðvum en ég þekki til en það var ekkert sem var lagt fyrir þingflokkinn," segir Arnbjörg.

Ingibjörg Sólrún Gísladóttir, utanríkisráðherra og formaður Samfylkingarinnar, lýsti því yfir um helgina að frumvarp um breytingar á eftirlaunum æðstu embættismanna sé í smíðum og hugsanlegt sé að það komi fyrir þingið fyrir þinglok. Þar eigi meðal annars að afnema lagaákvæði um að menn geti bæði verið á eftirlaunum og þegið laun fyrir annað starf.

Aðspurð um stuðning við slíkt frumvarp innan þingflokks Sjálfstæðisflokksins segir Arnbjörg að þingflokkurinn hafi ekki séð það og umræða um málið hafi ekki farið fram. Hún bendir þó á að þingflokkurinn hafi samþykkt stjórnarsáttmála sem geri ráð fyrir breytingum á lögunum en umræður um frumvarpið fari fram þegar það líti dagsins ljós.