Patrick Swayze í bráðaaðgerð

Leikarinn Patrick Swayze var lagður í skyndi á sjúkrahús á dögunum. Swayze þjáist af krabbameini í brisi, en samkvæmt yfirlýsingum lækna hans gengur meðferð á því vel. Annað er að heyra á heimildamönnum National Enquirer, sem segja að nýleg skoðun á brisinu hafi leitt í ljós að meinið hefði breiðst út í magann. Því var gerð bráðaaðgerð þar sem hluti magans var fjarlægður.

Þrátt fyrir þessi nýjustu vonbrigði er Swayze sagður hvergi af baki dottinn. Hann er á fullu í tökum fyrir nýjustu mynd sína, Powder Blue, og deilir tíma sínum milli þeirra, fjölskyldunnar og sjúkrahússins.