Blóðugt niðurskurðarfrumvarp

Fjárlagafrumvarp ríkisstjórnarinnar er blóðugt niðurskurðarfrumvarp, að mati Steingríms J. Sigfússonar formanns Vinstri grænna.

,,Allar forsendur gamla frumvarpsins eru foknar út í veður og vind. Hér er um að ræða blóðugt niðurskurðarfrumvarp," segir Steingrímur. Frumvarpið er að hans mati sameiginlegt útspil ríkisstjórnarinnar og Alþjóðagjaldeyrissjóðsins. ,,Enda deila þessir aðilar nú með sér völdum í landinu. Og ekki í miklu umboði þjóðarinnar."

Tekjuskattur hækkar um eitt prósentustig auk þess sem sveitarfélögin fá heimild til að hækka útsvar um hálft prósentustig. Þetta er meðal þess sem er í endurskoðuðu fjárlagafrumvarpi sem ríkisstjórnin kynnti í morgun. Halli ríkisjóðs á næsta ári stefnir í hundrað og sjötíu milljarða króna.

Steingrímur gagnrýnir að fjárlaganefnd hafi fengið að sjá frumvarpið á sama tíma og forystumenn ríkisstjórnarinnar kynntu efni frumvarpsins á blaðamannafundi. ,,Fjárlaganefnd voru veittar litlar upplýsingar og afdrifaríkir þættir eiga að bíða til þriðju umræðu."

,,Ég gagnrýni sérstaklega að farið sé inn í almannatryggingakerfið með skerðingar og síðan að tekjuöflunin skuli vera flatar skattahækkanir." Eðlilegra hefði verið að dreifa byrðunum á annan hátt. Svo sem með því að taka upp hátekjuskatt eða hækka skattleysismörk.