Sneijder segist líklega ekki spila gegn Íslandi

Sjö leikmenn eru á sjúkralista hollenska landsliðsins og litlar líkur eru þar að auki á því að Wesley Sneijder, leikmaður Real Madrid, verði með í landsleik Hollands og Íslands um helgina.

Sneijder er í hollenska landsliðshópnum en Real Madrid vill ekki að hann taki þátt í leiknum um helgina.

„Ég vil spila en það er samkomulag í gildi," sagði Sneijder við hollenska fjölmiðla. „Ég mun því mjög líklega ekki spila á laugardaginn," bætti hann við.

Edwin van der Sar, markvörður Manchester United, hefur verið kallaður í landsliðshópinn eftir að hann hætti með því eftir EM í sumar. Var það gert þar sem að Maarten Stekelenburg á við meiðsli að stríða.

Aðrir sem eru meiddir eru varnarmennirnir John Heitinga, Wilfried Bouma og Khalid Boulahrouz sem og sóknarmennirnir Robin van Persie, Arjen Robben og Jan Vennegoor of Hesselink.