ESB tilbúið að endurskoða samskipti við Kúbu

Evrópusambandið er tilbúið að koma aftur á eðlilegum samskiptum við Kúbu nú þegar Fidel Castro hefur ákveðið að láta af embætti forseta. Þetta sagði talsmaður Louis Michel, framkvæmdastjóra hjálparstarfs sambandsins, á reglulegum fundi með blaðamönnum í morgun.

Þar kom einnig fram að Michel hygðist heimsækja eyna í byrjun næsta mánaðar. Talsmaðurinn neitaði að tjá sig frekar um ákvörðun hins aldna leiðtoga.

Andað hefur köldu á milli Castros og Evrópusambandsins eftir að yfirvöld á Kúbu handtóku 75 andófsmenn í landinu árið 2003, en mörgum þeirra hafði verið boðið í veislur á vegum evrópskra sendiráða á Kúbu.

Annar talsmaður á vegum Evrópusambandsins greindi frá því í morgun að sambandið vildi gjarnan taka upp pólitísk samskipti við stjórnvöld í Havana á ný.