Fidel Castro lætur af embætti sem forseti Kúbu

Fidel Castro hyggst ekki gefa kost á sér aftur sem forseti Kúbu. Þetta kemur fram í bréfi hans sem birt er í opinberu blaði Kommúnistaflokksins, Granma, í dag.

„Ég hef hvorki löngun né vil ég taka að mér embætti forseta ríkisráðsins og yfirhershöfðingja," segir í bréfi Castros og vísar hann meðal annars til veikinda sinna sem ástæðu þess að hann dregur sig í hlé.

Fidel Castro fól bróður sínum, Raul, að halda um stjórnartaumana á Kúbu sumarið 2006 en þá veiktist hann heiftarlega og þurfti að gangast undir aðgerð. Hann hefur ekki sést opinberlega síðan ef undan eru skildar myndir í blöðum og sjónvarpi á Kúbu.

Castro er 81 árs og hefur stjórnað Kúbu frá því að kommúnistar tóku þar völdin árið 1959 í vopnaðri uppreisn. Hann hefur því setið á forsetastól í nærri hálfa öld sem gerir hann að einum þaulsetnasta leiðtoga heims. Castro hafði í desember ýjað að því að hann myndi láta af embætti forseta landsins svo yngri leiðtogi kæmist að en hann var engu að síður í framboði til þings fyrr á þessu ári.

Í bréfinu í Granma tók Castro skýrt fram að hann væri ekki að kveðja þjóð sína og hann myndi halda áfram hugmyndafræðilegri baráttu sinni. Þar vísar hann til skrifa sinna undir titlinum Hugsanir félaga Fidels.

Búist er við því að kúbverska þingið komi saman á sunnudag og kjósi Raul Castro forseta landsins en hugsanlegt er talið að yngri maður, varaforsetinn Carlos Large sem er 56 ára, verði fyrir valinu.