Óskarinn að renna út á tíma

Skipuleggjendur Óskarsverðlaunahátíðarinna segjast vera að renna út á tíma með að komast að samkomulagi til að forðast að hátíðin verði fyrir barðinu á verkfalli handritshöfunda. Hætta er á að verðlaunin verði sniðgengin af Hollywoodstjörnum og umfang hennar því orðið minna ef handritshöfundar samþykkja ekki að hætta við verkfallsvörð við hátíðina 24. febrúar næstkomandi.

Sid Ganis yfirmaður verðlaunanna sagði á fréttavef BBC að handritshöfundar hefðu ekki svaraði fyrirspurn um málið.

Leiðtogar verkalýðsfélaga segja að þeir vonist til að kynna bráðabirgðasamkomulag um helgina sem binda muni enda á deilu handritshöfunda.

Samtök handritahöfunda í Bandaríkjunum hafa þegar samþykkt að vera ekki með verkfallsvörslu við Grammy verðlaunin sem verða afhent í Los Angeles á sunnudag. Þeir muni leyfa handritshöfundum að vinna við hátíðina.

Samtökin hafa þó ekki gefið grænt ljós á Óskarinn.

Í síðasta mánuði hafði verkfallið þær afleiðingar fyrir Golden Globe verðlaunin að þau voru tilkynnt á klukkutíma blaðamannafundi án þess að kvikmyndastjörnurnar væru viðstaddar.

Ganis segir að skipuleggjendur Óskarsverðlaunanna verði að vita fyrirætlanir samtakanna eins fljótt og mögulegt er. „Við erum að komast á endasprettinn og verðum að fara að gera plön."

„Þeir sem koma fram á verðlaunahátíðinni eru alls staðar að úr heiminum og ég er farinn að hafa verulegar áhyggjur af þessu," sagði Ganis í viðtali við Variety timaritið.