SUS hvetur íslenska stjórnmálamenn til að sniðganga ÓL

Samband ungra sjálfstæðismanna hvetur íslenska stjórnmálamenn til að sniðganga opnunar- og lokahátíð Ólympíuleikanna sem hefjast í Peking 8. ágúst og sýna með þeim hætti andstöðu íslenskra stjórnvalda við meðferð kínverskra stjórnvalda á þegnum sínum.

Í tilkynningu frá ungum sjálfstæðismönnum kemur fram að Kína ríki alræðisstjórn sem skeyti litlu um mannréttindi og velferð íbúa sinna. Íbúar Tíbet hafi þurft að þola sérstaklega harða og ógeðfelda meðferð í rúma hálfa öld af hálfu ríkis sem þeir nauðugir hafa verið innlimaðir í. „Aðgerðir kínverskra yfirvalda í Tíbet undanfarnar vikur sýna hversu röng ákvörðun það var af hálfu Alþjóðaólympíunefndarinnar að velja Peking sem mótstað leikanna," segir einnig í tillögunni.

Ungir sjálfstæðismenn telja hins vegar sjálfsagt að íslenskir afreksmenn taki þátt í leikunum með öðrum íþróttamönnum heims og sýni þannig samstöðu með íbúum Kína í að vilja stuðla að friði og velferð í heiminum. „Hins vegar er algjör óþarfi að íslensk stjórnvöld sendi sína fulltrúa á leikana. Slíkar heimsóknir verða að áróðursvopni í höndum þarlendra stjórnvalda. Þegnar Kína, sem beittir eru harðræði og sviptir mannréttindum, eiga ekki að fá þau skilaboð að kúgarar þeirra njóti sérstakrar virðingar og velvilja leiðtoga lýðfrjálsra þjóða," segir SUS.