Dagvaktin bjargaði sveitinni um tvær símstöðvar

Upptökur á sjónvarpsþáttunum Dagvaktinni á Hótel Bjarkarlundi í Reykhólasveit hafa þær ánægjulegu afleiðingar fyrir íbúana þar að tvær farsímastöðvar verða settar þar upp.

Þriggja ára barátta íbúanna fyrir því að fá farsíma- og tölvutengingu hjá Símanum hafði engan árangur borið fyrr en ákveðið var að taka upp Dagvaktina þar. Árni Sigurpálsson, eigandi Hótel Bjarkalundar, segir að Vodafone eigi heiður skilið fyrir að hafa sett upp símstöð við hótelið núna en samkvæmt áætlunum átti slíkt ekki að gerast fyrr en síðar í sumar.

„Ég er búinn að standa í stappi við Símann um að koma upp farsímasambandi hér í sveitinni undanfarin þrjú ár en ekkert hefur gengið," segir Árni.

„Þar að auki eru landlínurnar allar meira og minna ónýtar og því oft símasambandlaust hér. Nú ætlar Síminn hins vegar að setja upp stöð hér á morgun þannig að allt í einu er sveitin komin með tvær farsímastöðvar."

Árni segir að hann skilji ekki af hverju símfyrirtækin tvö hafi ekki sameinast um eina stöð. „Þetta er allt furðulegt og með ólíkindum," segir Árni. „Samkvæmt útboði sem efnt var til átti Vodafone að setja upp stöð hér seinna í sumar en þeir ákváðu að flýta þeirri framkvæmd vegna upptöku á sjónvarpsþáttunum. Og ég vil segja að Vodafone á heiður skilinn fyrir að hafa flýtt framkvæmdum sínum."

Upptökur á Dagvaktinni munu hefjast á Hótel Bjarkalundi í kringum 10. apríl og segir Árni að þá verði allt tilbúið til taka á móti stjörnunum. Og ekki ætti fólkið að verða í neinum vandræðum með símasambandið.