Samgöngumiðstöð innsigluð

Samgönguráðherra kom til fundar við borgarstjóra í Ráðhúsinu laust fyrir hádegi ásamt ráðuneytisstjóra sínum og aðstoðarmanni en tilgangurinn var að leysa þann húsnæðis- og aðstöðuskort sem innanlandsflugið hefur búið við á Reykjavíkurflugvelli. Eftir rúmlega klukkustundar langan fund var kynnt sú niðurstaða að byggja á þriggja ára gömlu samkomulagi þáverandi borgarstjóra og samgönguráðherra um samgöngumiðstöð norðan við Loftleiðahótelið og setja verkefnið á fulla ferð þannig að hún verði fullbyggð um mitt ár 2010 en fyrsti áfangi verði tilbúinn fyrir árslok 2009. Fram að þeim tíma mun borgin heimila að þau flugfélög sem þess óska geti reist sér bráðabirgðaaðstöðu á nyrsta hluta lóðarinnar, rétt sunnan Hringbrautar, og á lóðin að vera tilbúin síðar á þessu ári.

Báðir fögnuðu ráðherrann og borgarstjóri þessari niðurstöðu eftir fundinn. Borgarstjóri sagði höggvið hefði verið á hnút þann sem málið hefði verið í og að full eining væri innan borgarstjórnarmeirihlutans um niðurstöðuna. Báðir aðilar legga áherslu á að með þessari miklu byggingu sé ekki verið að festa flugvöllinn í sessi, enda eigi hún einnig að þjóna rútubílum, strætisvögnum og leigubílum. Borginni er ætlað á ganga frá skipulagsmálum á næstu hundrað dögum. Flugstoðir munu stofna sérstakt félag um samgöngumiðstöðina en gert er ráð fyrir að hún verði reist sem einkaframkvæmd.