Lestarkönnunartillaga samþykkt í fjarveru borgarstjóra

Borgarráð sameinaðist í dag um tillögu þar sem ákveðið var að kanna fýsileika þess að koma á lestarsamgöngum milli miðborgar Reykjavíkur og Keflavíkur annars vegar og léttlestarsamgöngur innan Reykjavíkur hins vegar. Tillagan var samþykkt í fjarveru Ólafs F. Magnússonar borgarstjóra en hann hefur lýst yfir efasemdum um að lestarsamgöngur séu raunhæfur kostur.

Fram kemur í tilkynningu frá Degi B. Eggertssyni, oddvita Samfylkingarinnar í borgarstjórn, að minnihlutinn hafi lagt fram tillögu þessa efnis. Það var gert í framhaldi að hugmyndasamkeppni um skipulag Vatnsmýrarinnar.

Þeirri tilögu var vísað til umhverfis- og samgönguráðs borgarinnar og í kjölfarið lögðu borgarráðsfulltrúar Sjálfstæðisflokksins fram með nánast samhljóða tillögu í eigin nafni á síðasta fundi borgarráðs, 13. mars. Henni var frestað fyrir páska að beiðni borgarstjóra.

Á fundinum í dag var hins vegar ákveðið að sameinast um eina tillögu. Hún gerir ráð fyrir að umhverfis- og samgöngusvið kanni hagkvæmni og fýsileika þess að koma á lestarsamgöngum milli Keflavíkurflugvallar og miðborgarinnar annars vegar og léttlestarkerfis innan borgarinnar hins vegar. Er þar meðal annars vísað til breytinga á eldsneytisverði í heiminum, þéttingar byggðar, umhverfisþátta og áherslu á nýtingu innlendra orkugjafa.

„Við úttektina verði endurskoðaðar og uppfærðar fyrri úttektir sem unnar hafa verið um lestarsamgöngur á vegum borgarinnar og fjárhags-, umhverfis- og skipulagsþættir greindir. Ennfemur verði lagðar fram upplýsingar um kostnað vegna rekstrar lesta milli Reykjavíkur/Keflavíkur og rekstrar léttlesta á höfuðborgarsvæðinu. Úttektin verði unnin í samvinnu við skipulags- og byggingarsvið Reykjavíkurborgar og samgönguyfirvöld í landinu. Samráð skal haft við Orkuveitu Reykjavíkur," segir enn fremur í tillögunni.

Er borgarráð reiðubúið að leggja allt að tíu milljónir til þessa verkefnis að því tilskyldu að það verði kostað til helminga af ríki og borg. Umhverfis- og samgöngusvið á að skila til borgarráðs ítarlegri verkefnalýsingu og kostnaðaráætlun vegna verksins eigi síðar en 1. júní.

Efaðist um að lestarsamgöngur væru raunhæfur kostur

Athygli vekur að Ólafur F. Magnússon var fjarverandi þegar tillagan var samþykkt en hann er nú í fríi. Í lok febrúar þegar umræðan um lestarsamgöngur kom upp lýsti hann því yfir á borgarstjórnarfundi að það kæmi sér verulega á óvart ef tillögur um lestarsamgöngur, sem fengið hefðu hraklega meðferð í umræðum fyrir nokkrum árum, fengju betri meðferð nú. Það væri gífurlega dýr kostur og hann efaðist um að lestarsamgöngur væru raunhæfur kostur.