Laufey Johansen sýnir í London

Myndlistarkonan Laufey Johansen opnaði einkasýningu á verkum sínum í Design Centre í Knightbridge í London á fimmtudag. Sverrir Haukur Gunnlaugsson sendiherra í London hélt ræðu við það tilefni en fjölmenni var viðstatt opnunina.

Listamaðurinn sjálfur var himinlifandi með undirtektir gestanna á verkunum sem öll eru svört, unnin í olíu á striga. „Fólk var mjög hissa og fannst þarna eitthvað nýtt og öðruvísi á ferðinni," sagði hún þegar Vísir náði tali af henni í London. „Þetta hitti bara algjörlega í mark."

Auk sendiherrans var fjöldi góðra gesta við opnunina, meðal annars ræðismaður Færeyja í London og íslenskt athafnafólk í borginni.

Fjöldi verka seldist á sýningunni. Grísku banki hafði meðal annars samband, en hann er að leita að verkum í útibúið hér í London," sagði Laufey.

Laufey bauðst að taka þátt í Icelandic Festival í Liverpool á vegum útflutningsráðs og sendiráðsins í London á síðasta ári. Þar var henni boðið að halda sýninguna í Design Centre nú, en það er í eigu Dagmarar Þorsteinsdóttur og Magnúsar Magnússonar.