BNA: Afsögn þýðir ekki stríð við Íran

Robert Gates, varnarmálaráðherra Bandaríkjanna, hefur vísað á bug sem „fáránlegum" sögusögnum að afsögn æðsta yfirmanns hersins í Írak þýði að Bandaríkin ætli í stríð við Íran.

Á fréttavef CNN segir að William Fallon hafi sagt af sér í gær eftir einungis eitt ár sem yfirmaður bandarísks herafla í Mið-Austurlöndum og Mið-Asíu. Ástæðan hafi verið ónákvæm túlkun á því að hann sé á móti Bush-stjórninni vegna stefnunnar í málefnum Írans. Í yfirlýsingu Fallons sagði hann of mikið bil á milli skoðanna sinna og stefnu stjórnvalda.

Samkvæmt fregnum í bandarískum fjölmiðlum mun Fallon hafa verið alfarið á móti áætlunum Bush-stjórnarinnar um að gera árás á Íran vegna deilunnar um kjarnorkuvæðingu þess.

Gates sagði í gær að hann skildi ákvörðun Fallon og að um rétta ákvörðun væri að ræða af hans hálfu.