Ríkisstjóra New York gefinn úrslitakostur

Eliot Spitzer, ríkisstjóra New York, hefur verið gefinn lokafrestur af andstæðingum sínum til að segja af sér embætti. Að öðrum kosti verði hann kærður vegna ásakana um að hann hafi nýtt sér þjónustu vændiskonu. Helsti andstæðingur hans úr hópi repúblíkana í New York gaf honum tvo sólarhringa til að segja af sér.

Spitzer hefur ekki viðurkennt að hafa borgað fyrir kynlíf, en hann sagði á blaðamannafundi að hann hefði brugðist fjölskyldu sinni. Getgátur eru uppi um að hann gæti einnig átt von á ákæru vegna rannsóknar á óreglulegum greiðslum sem bárust inn á reikning gleðikonunnar.

Stjórnmálamenn í New York eru slegnir vegna ásakananna gegn Spitzer sem komst til valda vegna áherslu á að uppræta spillingu. James Tedisco, leiðtogi repúblíkana á þinginu í New York, sagði: „Ef hann segir ekki af sér á næstu einum til tveimur sólarhringum munum við undirbúa lögsókn á hendur honum og koma honum þannig úr embætti."

Spitzer baðst afsökunar á athæfi sínu á blaðamannafundi í gær.

„Ég hef valdið vonbrigðum og ekki lifað samkvæmt þeim siðareglum sem ég ætlast til af sjálfum mér," sagði hinn 48 ára gamli fjölskyldufaðir þriggja unglingsstúlkna. „Ég verð að fá tíma til að endurvinna traust fjölskyldunnar."

Hillary Clinton forsetaframbjóðandi kom sér hjá því að svara spurningum um kynlífshneyksli Spitzers sem er pólitískur bandamaður hennar. Aðspurð svaraði hún: „Ég hef ekkert að segja um málið. Auðvitað sendi ég mínar bestu óskir og hugsanir til ríkisstjórans og fjölskyldu hans."

Spitzer var eitt sinn talinn rísandi stjarna innan Demókrataflokksins. Hann tók við embætti ríkisstjóra í janúar á síðasta ári eftir yfirburðasigur og átta ár sem ríkissaksóknari í New York.