Póstverslun með lyf verði heimiluð

Guðlaugur Þór Þórðarson heilbrigðisráðherra hefur lagt fram á Alþingi frumvarp um breytingu á lyfjalögum sem miða að því að auka samkeppni á lyfjamarkaði og þjónustu við neytendur eins og segir í greinargerð.

Lagt er til að bann við póstverslun með lyf verði fellt brott og jafnframt að sala á nikótín- og flúorlyfjum verði heimiluð utan lyfjabúða. Í því skyni að ná niður lyfjaverði og halda lyfjakostnaði stofnana í lágmarki er lagt til að verð á lyfseðilsskyldum lyfjum verði það sama um allt land og að lyfjanefndir sjúkrahúsi gefi út bindandi lista um notkun á lyfjum á viðkomandi stofnun.

Þá er lagt til að eftirlit og eftirfylgni með lyfjaávísunum og aukaverkunum lyfja verði styrkt með því að lengja varðveislutíma gagna í lyfjagagnagrunni landlæknis úr þremur árum í 30 ár. Þá er lögð til einföldun á stjórnsýslu með því að flytja leyfisveitingar á sviði lyfjamála frá ráðuneytinu til Lyfjastofnunar.