Varað við óveðri milli Ólafsvíkur og Grundarfjarðar

Vegagerðin varar við óveðri milli Ólafsvíkur og Grundarfjarðar og biður fólk einnig að vera vakandi fyrir aukinni hálku þar sem er að hlána.

Hálka og skafrenningur er á Hellisheiði og í Þrengslum en hált er um mestallt Suðurland og það fennir í kring um Vík. Á Vesturlandi er víða hálka eða hálkublettir en á heiðum er snjókoma eða skafrenningur.

Á Vestfjörðum er snjóþekja eða hálka og víða snjókoma eða él. Þá er víða einhver ofankoma eða skafrenningur á Norðurlandi og þar er ýmist hálka eða hálkublettir á vegum. Á Norðaustur- og Austurlandi eru víða hálkublettir eða einhver snjóþekja. Öxi er ófær.