Frekari skuldir Jackson koma í ljós

Michael Jackson hefur ítrekað sleppt afborgunum af húsi sem fjölskylda hans notar í Los Angeles. Nýlega kom fram að Jackson gæti missti Neverland búgarð sinn vegna leiguskulda upp á rúmlega 1,6 milljarð íslenskra króna.

Samkvæmt opinberum skjölum er um að ræða eign í Encino í Kaliforníu sem fjölskylda söngvarans hefur notað í fjölda ára. Ógreiddar afborganir af húsinu hljóða upp á rúmar 10 milljónir íslenskra króna. Greiðslurnar eru af 4 milljón dollara láni frá Indymac Bankanum í Pasadena.

Samkvæmt heimildum er hinn 49 ára gamli söngvari að leita eftir nýju láni til að bjarga Neverland búgarðinum sem verður annars seldur á uppboði í næsta mánuði. Það gerist ef hann borgar ekki leigugjöldin fyrir 19. mars.