Stóra gjöfin hennar Opruh

Nýr raunveruleikaþáttur Oprah Winfrey „Oprah's Big Give" fer í loftið vestanhafs á morgun. Þátturinn er keppni meðal þeirra sem vilja láta gott af sér leiða.

Þátturinn er að hluta í líkingu við raunveruleikaþættina Apprentice og Extreme Makeover: Home Edition. Í honum munu tíu manns keppa um að verða uppáhalds gefandi Opruh, og án þess að vita af því fær hann eina milljón bandaríkjadala að lokum. Hann mun að öllum líkindum gefa þá upphæð til góðgerðarmála.

Í byrjun þáttarins eru þátttakendurnir tíu sýndir þar sem þeir fá símtal frá Opruh og eru undrandi yfir því að hún býður þeim að taka þátt. Einhvern veginn gleymist að áhorfendur átta sig flestir á því að búið er að koma fyrir kvikmyndavélum og því ekki svo óvænt uppákoma í gangi. Raunveruleikasjónvarp upp á sitt besta, eða hvað?

Meðal keppenda eru ungur veffyrirtækjamilljónamæringur, lamaður maður í hjólastól, lestarþjónn og kona sem er einfaldlega þreytt á því að hugsa alltaf um sjálfa sig. Þeim er skipt upp í nokkurs konar Amazing Race lið og gefin nöfn fólks sem þau eiga að hjálpa. Meðal þeirra er heimilislaus móðir, fyrrverandi hermaður sem er mjög fjárþurfi og kona sem rekur miðstöð fyrir fatlað fólk.

Og keppnin um að afla sem mest fjár hefst.