Rithöfundur viðurkennir að hafa falsað ævisögu

Belgískur rithöfundur hefur viðurkennt að hún hafi skáldað metsöluævisögu sína sem segir frá æskuárum hennar þegar hún bjó á meðal úlfa á tímum Helfararinnar. Frönsk kvikmynd hefur verið gerð eftir bókinni „Misha: Minningar frá árum Helfararinnar" og bókin var þýdd á 18 tungumál.

Lögmenn Misha Defoneseca segja að hún hafi viðurkennt að saga hennar væri ekki sannsöguleg og að hún hafi ekki gengið rúma þrjú þúsund kílómetra þvert yfir Evrópu með flokki úlfa til að leita foreldra sinna sem voru fluttir á brott á stríðsárunum.

Defonesca er 71 árs. Hún býr nú í Dudley í Massachusetts í Bandaríkjunum.

Í bókinni segir höfundurinn að Nasistar hafi tekið foreldra hennar þegar hún var barn og hún hafi þurft að leita til fjalla og þorpa í Evrópu ein síns liðs árum saman. Hún segist meðal annars hafa verið í gyðingahverfi í Varsjá í Póllandi, drepið hermann Nasista í sjálfsvörn og að úlfahópur hafi tekið hana að sér og verndað hana.

Í yfirlýsingunni sem send var AP fréttastofunni segir að bókin hafi verið hugarburður og hún hafi aldrei flúið heimili sitt í Brussel á stríðsárunum til að finna foreldra sína. Raunverulegt nafn hennar sé Monique De Wael og foreldrar hennar hafi verið drepnir af Nasistum.

„Sagan er mín. Hún er ekki sönn, en minn raunveruleiki, mín leið til að komast af," segir í yfirlýsingunni. „Ég byðst fyrirgefningar. Ég bið ykkur að setja ykkur í mín spor. Fjögurra ára stúlku sem var mjög týnd.