Gagnrýni Hrafns stenst ekki gagnrýni

Björn Bjarnason dómsmálaráðherra ræddi á bloggsíðu sinni í gær um ummæli Hrafns Bragasonar sem féllu á málþingi Orators á miðvikudaginn. Hrafn sagði þar að ekkert væri að kerfinu sem notað er til að skipa dómara hér á landi. „Vandamálið að mínu mati er þessi ráðherra," sagði Hrafn og átti þar við Björn.

„Af spurningum fréttamanna skilst mér, að Hrafn Bragason, fyrrverandi hæstarréttardómari, hafi veist að mér fyrir veitingu dómaraembætta á málþingi Orators miðvikudaginn 27. febrúar," segir Björn á síðu sinni en hann er staddur erlendis. „Ég veit ekki hvað Hrafn hefur fyrir sér. Gagnrýni hans stenst einfaldlega ekki gagnrýni."