Gætu þurft að fresta því að skjóta niður njósnahnött vegna veðurs

Bandarísk hermálayfirvöld gætu þurft að fresta því vegna veðurs að skjóta niður njósnahnött sem stefnir til jarðar.

Fram kemur á fréttavef Breska ríkisútvarpsins að bandarísku herskipin, þaðan sem ætlunin er að skjóta eldflaug að hnettinum, sigli í miklum ólgusjó á Kyrrahafi og öldugangurinn sé of mikill til þess að skipin komist í rétta skotstöðu.

Ætlunin er að skjóta njósnahnöttinn áður en hann kemur inn í andrúmsloftið en fram hefur komið að eldsneyti hans, hýdrasín, er hættulegt við snertingu.

Gervihnötturinn, sem gengur undir nafninu USA 193, varð stjórnlaus skömmu eftir að honum var skotið á loft í desember 2006. Hafa bandarísk yfirvöld beint því til sjófarenda og flugvéla að vera ekki á sveimi nærri tilteknu svæði á Kyrrahafinu í nótt ef tækifæri gefst til að skjóta hnöttinn niður.

Bandaríkjamenn hafa verið sakaðir um að vera bregðast við tilraunum Kínverja til að skjóta niður gervihnetti í fyrra með aðgerðinni og þannig kynda undir geimvopnakapphlaupi en því hafna þeir alfarið.