Túrkmenar minnast Turkmenbashi

Túrkmenar minnast í dag afmælis Saparmurat Niyazovs, fyrrum leiðtoga landsins sem lést árið 2006. Í tilefni dagsins var vígður nýr skóli sem byggður er í líki bókarinnar Rukhnama sem Niyazov, sem oftast var nefndur Turkmenbashi, eða faðir Túrkmena, skrifaði. Bókin varð að eins konar Biblíu og krafðist Turkmenbashi þess að landsmenn allir lærðu hana utanbókar.

Turkmenbashi var um margt sérstakur leiðtogi og átti hann það til að setja furðuleg lög og reglur í landinu. Hann bannaði embættismönnum sínum meðal annars að vera með gulltennur auk þess sem óperur og fjölleikahús voru bönnuð með öllu. Þá breytti hann nöfnum á mánuðum ársins og sem dæmi ber apríl nú nafn móður hans. Einnig vakti stytta sem reist var af honum í þessu fátæka landi mikla athygli, enn styttan er gríðarstór, gullslegin og snýr andlit leiðtogans ávallt mót sólu.

Þrátt fyrir að Turkmenbashi sé allur gætir áhrifa hans enn og svo dæmi sé tekið er bókin Rukhnama enn skyldulesning í grunnskólum landsins auk þess sem hlutar hennar eru notaðar í ökuprófum. Þó hefur arftaki Turkmenbashi, forsetinn með þjála nafnið, Kurbanguly Berdymukhamedov, dregið úr ofuráherslu á bókina Rukhnama. Sem dæmi um það má nefna að skólinn sem vígður var í dag á að leggja áherslu á vísindin en ekki á bókina sem nafn hans og útlit er dregið af.