Innkalla 65 þúsund tonn af nautakjöti í Bandaríkjunum

Landbúnaðarstofnun Bandaríkjanna hefur innkallað 143 milljónir punda, um 65 þúsund tonn, af frosnu nautakjöti frá sláturhúsi í Kaliforníu vegna gruns um illa meðferð í nautgripum þar.

Eftir því sem fram kemur á vef CNN hefur aldrei verið kallað inn jafnmikið af nautakjöti í Bandaríkjunum. Magnið dugir nokkurn veginn í tvo hamborgara á hvern Bandaríkjamann.

Sláturhúsið sem um ræðir heitir Westland/Hallmark og er í Suður-Kaliforníu. Það sér meðal annars ríkisskólum og stórum skyndibitakeðjum fyrir nautakjöti. Haft er eftir yfirmanni Landbúnaðarstofnunar Bandaríkjanna að Westland hafi brotið heilbrigðisreglur með því að skoða nautgripi ekki nægilega vel fyrir slátrun.

Yfirvöld lokuðu sláturhúsinu eftir að myndir náðust á falda myndavél af starfsmönnum Westland færa til sárþjáða og veika nautgripi með lyfturum. Slíkir nautgripir eru ekki taldir góðir til manneldis þar sem aukin hætta er talin á E.coli-smiti, salmonellu og kúariðu þar sem skepnurnar liggja oft í eigin úrgangi og ónæmiskerfi þeirra er veikt.

Talið er að um 19 þúsund tonn af nautakjötinu hafi farið í skóla í landinu og hefur stærstur hluti þess horfið ofan í svanga maga þar. Hins vegar hafa engar tilkynningar borist um veikindi eftir neyslu kjötsins.