Evrópusambandið sendir 2000 manna lið til Kósóvó

Evrópusambandið samþykkti í gærkvöldi að senda tvö þúsund manna gæslulið til Kósóvó til að annast eftirlit með lög- og dómgæslu og borgaralegri stjórn í héraðinu eftir að Kósóvó-Albanar hafa lýst einhliða yfir sjálfstæði frá Serbíu. Fastlega er búist við að þeir geri það á morgun, í óþökk Serba og Rússa.

Héraðið hefur lotið stjórn Sameinuðu þjóðanna síðasta áratuginn. Evrópusambandið mun taka við eftir hundrað og tuttugu daga aðlögunartíma. Ekkert ríki sambandsins mótmælti aðgerðaráætlun fyrir stjórn héraðsins, sem samþykkt var á tólfta tímanum í gærkvöldi.