Eldar loga víða í Danmörku vegna óeirða

Eldar hafa verið kveiktir á götum úti víða í Danmörku í kvöld þar sem ungmenni halda áfram að mótmæla því að danskir miðlar hafa á ný birt myndir af Múhameð spámanni.

Eldur var borinn að skóla í Vollsmose-hverfnu í Óðinsvéum í kvöld og voru tveir sextán ára piltar handteknir í tenglsum við það.

Þá kveiktu ungmenni í ruslatunnum á Nörrebrogade í Kaupmannahöfn. Þegar slökkviliðsmenn komu á vettvang grýttu ungmennin þá og þurftu þeir frá að hverfa. Engan sakaði í grjótkastinu en eitt ungmennanna var handtekið. Þá var kveikt í nokkrum bílum á Norðurbrú og í Valby var kveikt í nokkrum ruslagámum.

Í Gellerup-hverfinu í Árósum var einnig kveikt í ruslatunnum og rusli og sömuleiðis ruslagámum og býst lögregla þar í borg við frekari óróa þegar líður á kvöldið. 15 lögreglubílar eru á vakt og elta slökkviliðið eftir því sem segir á vef Jótlandspóstsins. Hefur strætisvagnaferðum um Gellerup verið aflýst í kvöld af ótta við óróann.

Forvígismenn múslíma í Danmörku höfðu í dag hvatt ungmenni til þess að hætta óeirðum en þau hafa staðið yfir undanfarin kvöld og nætur.