Mitt Romney styður John McCain

Mitt Romney, frambjóðandi í forkosningum repúblikana í Bandaríkjunum, sem dró sig út úr keppninni á dögunum hefur lýst því yfir að hann styðji John McCain í baráttunni fyrir útnefningu.

Romney og McCain tókust harkalega á í kosningabaráttunni en nú segir Romney að hann treysti engum öðrum betur til þess að fara með völdin í Hvíta húsinu. Þetta er talið mikilvægt fyrir McCain í ljósi þess að hann hefur átt í erfiðleikum með að ná til íhaldsmanna innan flokksins.

Nú eru aðeins tveir eftir í forkosningunum hjá repúblikönum, McCain og Mike Huckabee, og er talið nær ljóst að McCain muni hafa betur.

Hillary Clinton, annar frambjóðanda demókrata, fékk þær gleðifregnir í gær eftir röð ósigra að hún hafi sigrað forvalið í Nýja-Mexíkó sem fram fór 2. febrúar. Baráttan á milli hennar og Barack Obama var hins vegar svo hörð að níu daga tók að telja atkvæðin.