Fimm féllu í skotárás í háskóla í Illinois

Fimm féllu í árás byssumanns í Northern Illinois háskólanum í Bandaríkjunum í gærkvöld. Nemendur reyndu að koma sér í skjól þegar hvítur karlmaður vopnaður tveimur skammbyssum og haglabyssu hóf skothríð í fyrirlestrasal skólans. Lögregla segir að maðurinn hafi skotið sjálfan sig áður en þeir komu á vettvang og enn veit enginn hvað manninum gekk til.

Árásin stóð yfir í stutta stund en áður en yfir lauk lágu fimm í valnum, fjórar konur og einn karlmaður. Engar upplýsingar hafa verið gefnar um manninn en talið er að hann hafi fyrrvernandi félagsfræðinemi við skólann.

Tíu mánuðir eru nú liðnir frá skotárásinni í Virginia Tech háskólanum þar sem 32 féllu fyrir hendi byssumanns og er árásin í gær sú fjórða á einum mánuði sem á sér stað innan veggja skólabyggingar í landinu.