Beina ekki eldflaugum að öðrum ríkjum nema í ýtrustu neyð

Vladímír Pútín, forseti Rússlands, sagði í dag að Rússar myndu ekki beina eldflaugum sínum að neinu ríki nema í ýtrustu neyð. Þá vonaðist hann til þess að ekki kæmi til deilna við vestræn ríki í fyrirsjáanlegri framtíð.

Þessi orð hans á blaðamannafundi í Moskvu eru öllu hófstilltari en forsetinn hefur látið falla undanfarna mánuði, en Rússar eru mjög andvígir áformum Bandaríkjamanna að koma á fót eldflaugavarnarkerfi í Tékklandi og Póllandi til þess að verjast árásum óvinaríkja á borð við Íran og Norður-Kóreu.

Þá hafa staðið yfir deilur um stækkun NATO til austurs og sagði Pútín fyrr í þessari viku að Rússar gætu beint eldflaugum sínum að nágrannaríkinu Úkraínu ef ráðamenn þar ákveddu að ganga til liðs við bandalagið og ógnuðu þannig öryggi Rússlands.