Kínverjar harma ákvörðun Spielbergs

Kínverjar standa nú frammi fyrir vaxandi þrýstingi varðandi málefni Darfur-héraðs í Súdan í kjölfar þess að kvikmyndaleikstjórinn Steven Spielberg sagði upp sem listrænn ráðgjafi Ólympíuleikanna í Peking í sumar.

Dagblað á Englandi hefur birt bréf sem undirritað er af áttatíu nóbelsverðlaunahöfum og fyrrverandi íþróttamönnum þar sem Kínverjar eru hvattir til að beita sér fyrir lausn deilunnar. Kínverjar hafa ekki svarað þessari beiðni en stjórnvöld í Peking hafa harmað ákvörðun Spielbergs.

Leikstjórinn sagðist ekki geta hugsað sér að vinna að Ólympíuleikunum vitandi af því að Kínverjar væru að aðstoða stjórnvöld í Súdan. Stjórnvöld í Bandaríkjunum hafa hins vegar komið Kínverjum til varnar og segja illa vegið að Kínverjum með þessum hætti. Ástandið í Darfur sé ekki á þeirra ábyrgð og því eigi ekki að blanda málinu saman við komandi Ólympíuleika.