Aðsókn að leikhúsi meiri en á fótbolta

„Áhugi á leikhúsi er mjög mikill hér á landi, og fleiri sem sækja leikhús en fótboltaviðburði," segir Gunnar Andri Þórisson kynningar- og markaðsstjóri leikhus.is. Meira en 1.400 sögur hafa borist frá almenningi sem vill fá frítt í leikhús en í þessari viku ætlar vefurinn að bjóða 40 manns á tvær leiksýningar í Iðnó.

Almenningur getur sent tölvupóst með ástæðu fyrir því að þeir eigi að fá fría miða í leikhús. Meira en 1.400 sögur hafa borist frá því á föstudag.

Helena Kristinsdóttir hjá leikhus.is segir margar sögurnar frábærar. Sumum finnist þeir eigi að fá frítt í leikhús af því þeir geri aldrei neitt fyrir konuna sína og sumum konum vanti hreinlega ástæðu til að fara út í nýjum kjól. Úrval af sögunum verður svo birt á vefnum.

„Við áttum ekki von á að við fengjum svona ótrúlegar sögur og við fundum út að áhuginn er geigvænlegur," segir Gunnar sem átti hugmyndina að uppátækinu; „Við vildum líka vera með eitthvað nýtt og skemmtilegt og fólk virðist hafa mjög gaman af þessu."

Í fyrra gaf fyrirtækið um 400 leikhúsmiða á leiksýningar sem sýndar voru í leikhúsum um allt land.