Býst við mótmælum í Indónesíu vegna Múhameðsteikninga

Blásið verður til mótmæla í Indónesíu vegna þess að dönsk dagblöð birtu aftur skopmyndir af Múhameð spámanni sem ollu mikilli reiði meðal múslíma fyrir um tveimur árum. Þetta segir talsmaður 50 milljóna manna íslamskra samtaka í landinu í samtali við norska blaðið Aftenposten í dag.

Jyllands Posten, Politiken og Berlingske Tidende birtu í morgun teikningu Kurt Westergaard af Múhameð með sprengjutúrban. Var það gert í kjölfar frétta af því að danska lögreglan hefði komið í veg fyrir áform manna að myrða Westergaard.

Syaiful Bahri Anshori, talsmaður samtakanna Nahdlatul Ulama, stærstu íslömsku samtakanna í Indónesíu, segir mikla reiði vegna birtingarinnar.

„Samtök okkar beita ekki ofbeldi og við mótmælum því að fólk brenni fána og standi fyrir ofbeldisfullum mótmælum. En það eru önnur samtök sem munu beita slíku," segir Anshori í samtali við Aftenposten. Hann segist hins vegar munu skrifa bréf til danska sendiráðsins í Djakarta til að mótmæla gerningi danskra miðla. Þá áformar hann einnig að senda bréf til Sameinuðu þjóðanna.

Indónesía er fjölmennasta múslímaríki í heimi en þar búa yfir 200 milljónir manna.