UNICEF þarf 58 milljarða til að aðstoða konur og börn

Barnahjálp Sameinuðu þjóðanna þarf rúmlega 58 milljarða króna til að koma börnum og konum til hjálpar á neyðarsvæðum í 39 löndum víðs vegar um heiminn. Þetta kemur fram í nýrri skýrslu samtakanna sem nefnist Humanitarian Action Report og var kynnt í gær.

Í tilkynningu frá UNICEF á Íslandi kemur fram að í skýrslunni sé fjallað um lönd þar sem pólitísk átök geisa, eins og Tsjad og Kenía. Í síðarnefnda landinu hafa 300 þúsund manns flúið heimili sín og dvelja í flóttamannabúðum. Helmingur þeirra er börn. UNICEF áætlar að 80 þúsund þessara barna séu yngri en fimm ára.

Í skýrslunni eru einnig upplýsingar um svæði sem skekin eru af átökum en rata ekki lengur í fréttir. Þar halda börn hins vegar áfram að þjást. Enn fremur er bent á þjóðir sem hafa orðið illa úti í náttúruhamförum eins og Mósambík þar sem mikil flóð hafa verið.

Í skýrslunni er athyglinni einnig beint að þeirri skelfilegu staðreynd að konur og börn eru í auknuM mæli fórnarlömb skipulagðra nauðgana, sem mismunandi hópar beita oft kerfisbundið gegn óvinum sínum.