Chavez hótar að skrúfa fyrir olíuna

Forseti Venezúela, Hugo Chavez, hótaði því í gær að skrúfa fyrir olíuinnflutning til Bandaríkjanna láti þarlend stjórnvöld ekki af því sem Chavez kallar efnahagsstríð. Bandarískir og breskir dómstólar hafa fryst fé á reikningum ríkisolíufyrirtæksins í kjölfar málshöfðunar bandaríska olíurisans Exxon Mobil.

Exxon heldur því fram að stjórnvöld í Venezuela hafi ekki borgað nægilega miklar skaðabætur þegar olíuiðnaðurinn í landinu var þjóðnýttur á sínum tíma. Chavez komst til valda þegar hann lofaði þjóðinni að olíuauðurinn yrði eftir í landinu en færi ekki í vasa erlendra auðhringja.