Handtekinn vegna smygls á fólki í gastanki

Ökumaður flutningabíls sem hafði átta laumufarþega í gastanki bílsins þegar hann var stöðvaður í suðurhluta Lundúna hefur verið handtekinn vegna gruns um að smygla fólki á milli landa. Samkvæmt heimildum Sky fréttastofunnar er hinum 55 ára gamla ökumanni haldið á lögreglustöð í suðurhluta borgarinnar á meðan verið er að hlúa að fólkinu sem andaði að sér gasi.

Upphaflega var skýrt frá því að ökumaðurinn hefði uppgötvað fólkið, sem talið er vera frá Afghanistan, þegar hann stoppaði til að athuga farm sinn. En verkamenn sem unnu við nálæga vatnsæð segjast hafa stöðvað ökumanninn eftir að þeir heyrðu bank og öskur koma frá tanknum þegar hann fór hjá þeim.

Vitni sögðu Sky að fólkið hefði verið máttlaust og alsett svörtu efni þegar það kom úr tanknum.